Me soi levat d’ora aqueste matin per anar crompar la Despacha. Urosament que l’avèm aquel jornal, se que non saurièm pas ont ne sièm del fuèlheton UAG. Sul forum i a plan temps que lo monde se planhon del manca de comunicacion de la Direccion del club, emai an rason. La transparéncia es pas la qualitat primièra d’En Mauillon. Cal dire que quand las causas son pas relusentas, nimai bonas a dire…
E d’efièch, las causas son pas relusentas. Imaginatz que legissi pel primièr còp aquò : « Lo demens d’aquesta sason, que se monta, vertat es, a la mitat del budgècte, es estat jutjat inacceptable per la DNACG e lo president Mauillon èra pas a poder fornir las garantidas immadiatament exigidas per l’espongar ». Atal n’es que l’UAG a un defecit de la mitat de son budgècte ! Sabèm pas quin es lo montat del budgècte 2006-2007 per fauta de transparéncia. Pasmens la Despacha balhèt en debuta de sason 3 milions e en fin de sason 4 milions. Es mai probable que trachèsse de 4 milions. Adoncas aquò fariá que lo trauc de l’UAG seriá de mai o mens 2 milions d’èuros. Dins aquestas condicions, e se las informacions que podèm trapar aicí o ailà son exactas, al final la DNACG a rason d’arrestar lo massacre. Mas qual pagarà los deutes ? Los que los fasquèron probablament.
En Mauillon e los bailes de nòstre club devon aver consciéncia de la marrida passa dins laquala an metut lo club estant que fan pas apèl de la decision de la Direccion d’Ajuda e de Contraròtle. Atal, aqueste còp las fabas son descufeladas e las va càler engolir. La sason que ven tornarèm en Federala 1. Es Lemòtges que se frota las mans. Lo malur dels unes fa lo bonur dels autres. E vira la ròda del rugbí…

mes dé qué racounto aquel oumo té nous a foutut uno puto dé mal dé cap en lisén tout acquo qué amé lou blairo sien couplétomén crébat de letsi tout aquo

Car Rantanplan,
Tot s'afraba a l'entorn de nosautres. L'an que ven l'UAG risca de se retrobar en seria (en onor, te rendes compte!) e tu voldriás demorar plan panet, a l'ombra d'una figuièra, a juscar una bonda fins al darrièr trocinet de lèuge? Te veses l'an que ven anar a La Bòria per agachar una partida contra Britèsta. Ai pas res contra los valents de Britèsta, mas, çò que se vei s'amaga pas, lo nivèl de jòc es pas lo meteis entre Tolon e los rubiaires britestòls.
Mas as rason en partida. A de qué pòt servir de se far una sang de vinagre alara qu'avem quitament pas las informacions minimalas que nos porián eventualament servir a ensajar de poder benlèu enfaciar lo començament de la debuta d'un entemenon probablament prevesible, e amb plan d'astre ipoteticament realisable, de solucion?
La solucion es En Mauillon que l'a. Es el e es el sol. Nautres podem sempre contunhar a far d'especulacion subre l'endevenir del club que res i cambiarà pas.
Mas sabes, Rantanplan, ieu soi atal: se fau prangièra, pòdi pas mai dormir la nuèit. E coma la nuèit ai pas enveja de viure tres rescontres a-de-reng entre las còlhas de Britèsta e de l'UAG... M'estimi melhor pianotar cinc minutas sul clavièr de l'ordinator.
Ten-te fièr.