La Casconha cunha.

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

La Casconha cunha.

Message non lu par Sergi »

Cars Juscabondas,
Dissabte passat ai pas assistit a la destrensilhada dels nòstres "Pichons" qu'èri accupat sus un autre front. Macarèl de macarèl çò que pòdon èsser aluserpits aqueles Gascons! Nimai, per un còp, se pòt pas dire qu'es en causa qu'an mai d'argent que nautres. Mas an l'experiéncia d'un club professional desempuèi mai de temps que nautres e aquò compta bravament. An quitament evoluits fa pas gaire en Tòp 16 o Tòp 14. L'experiéncia e la tradicion d'un rugbí de nauta volada dins la capitala de Gasconha compta per quicòm dins las resultas actualas del club. Òsca per eles!
Cars amics Juscabondas, contunhi d'escriure la lenga nòstra amb sa grafia origanala e non pas amb la grafia del francés. Espèri que me podètz legir aisidament, emai deu èsser lo cas per tant que recebi de responsas a las asenadas que pòdi, tot còp,escriure. Vautres vos cal contunhar d'escriure coma o sentissètz. Lo tot es de se comprene e nos comprenem. Pasmens se pòt que d'unes mots nos escapen. Vertat que m'arriba d'emplecar qualques mot que son pas sovent o brica utilisats dins la lenga parlada dins lo Galhaqués. Per exemple plus naut escrivi "òsca" a la plaça de "bravò". "Bravò" es un mòt que s'emplega pas en occitan per çò qu'avèm lo nòstre mot pròpri per exprimir l'exclamacion d'alegria: "òsca". Auriái pogut escriure "Bravò per eles", mas auriètz atal perdut l'escasença d'aprene un mot de mai en lenga nòstra.
Vòli pas far lo professor, mas es pas per çò que juscam mai que los autres que seriem pus colha que los autres.
Dimenge que ven serai a l'estadi per recebre La Rochèla. Aqueste còp caldrà ben ganhar se volem demorar al mièg del tablèu. Encara aquesta setmana siem nòuen (9en) malgrat las doas darrièras desfachas. A mon vejaire, emai s'ai pas fach lo desplaçament al moment de la partida anar, La Rochèla es una equipa largament vencibla. D'ont pas que la partida se va jogar a l'ostal. Mas me sembla vos aisir d'aicí, braves Jucaires, siètz a me far remarcar que l'infirmariá es comola. Aquò rai! Caldrà tornar véser aquò l'an que ben que siem totjorn en Pro D2 e benlèu, s'avèm l'argent, signar mai de 33 contractes coma ongan. Soi pas un especialista, mas me pensi que los clubs professionals que se tenon devon aver, a l'ora d'ara, almens un cinquentenat de contracte per dire d'aver pro de monde jos la man. Los quitis clubs de Tòp 14 an de que formar tres equipas professionalas. Ne siem pas aquí en Pro D2, mas nos caldriá almens aver de que ne fargar doas.
Mas bon! Farem çò que poirem amb çò qu'avèm! E per far de miracles, avèm pas besonh d'anar a Lorda, basta pas que de far fisança a l'Alan Galhard e al Cristòfol Lucquiòt.
Anem! chapini, chapini e lo temps passa. Vos daissi pel moment que me cal anar ara juscar d'autras bondas jos d'autres cèls. Mas aquò se sap: cap de bonda serà pas jamai tan bona que las las que se pòdon jucar a l'UAG.
A dimenge a La Bòria de Galhac.
Lo rugbí es una fèsta. Es l'espòrt occitan per excelléncia.
Répondre