Una desfacha de mai a Bernat Lapòrta.

[Sergi]

Brave monde,
Mararel de macarel, vòli pas prene la plaça d'Alan Galhard nimai la de Cristòfol Lucquiòt, mas me sembla que s'èri entrenaire arrendariái quatre causas dins aquestas equipa de Galhac.
1) Cal far coma los autres. Valent a dire que quand òm balança un còp de pè de segre, e ben... Tot simplament, coma son l'indica, cal segre lo balon e ensajar d'i èsser dessús abans l'adversari. Avètz vist cossí fasquèron los de Dacs aqueste vèspre? I aviá pas una minuta que la partida èra dubèrta e los jogaires de Dacs montèron tan vite sus un còp de pè de segre que contrèron l'arrièr galhagòl e te i fotèron un ensag sol nas. Cal dire que lo segonda linha banc-e-roge èra un despenja-figa que fasiá almens dos metres! Aquò rai! Çò que fan los autres, nautres deiriem èsser capable d'o far. Qualques còps me demandi se los jogaires de l'UAG an pas las sòlas en plomb. Son pas pro mobiles, son pas pro dimaniques, mancan de vam.
2) Lor cal encara e tornar aprene a placar a las cambas. Es pas possible quand òm es professional de placar en prenguent l'adversari pel malhòt. O alara, piège encara, de daissar passar lo jogaire advèrsa.
3) Cal aprene a far coma los All Blacks, valent a dire de far la passa a un coequipièr avant d'èsser amorrar dins la prada. Balhar, cada còp qu'es possible, la bofiga abans de tombar. Aquò balha de vam al jòc e desvaria los adversaris. Los de Dacs o fasquèron d'uèi e an logicament ganhat.
4) E la tocha? A çò que pareis qu'aquesta setmana la trabalhèron cada jorn. Bistanflèra! Resulta: zerò! Sabi pas quantes de còps perdèrem l'oliva d'uèi en tocha. Francament se jogam atal dimenge as Aush, anam prene una maleta...
Bon sabi ben, las causas son mai aisidas de far amb la lenga que concretament. Pasmens... Pasmens...
Una causa m'agradèt auèi. Ai vist que las òbras an començat per bastit la sala de musculacion e las tribunas que devon èsser dessús. Ai pas vist los plans de l'ensemble, pasmens lo public que serà dins aquestas tribunas serà pas vertadièrament plan plaçat. Aquí darrèr las pagelas es pas lo melhor endrech per assistir a la partida.
La question que me pausi es de saber perqué far maitas tribunas alara que siem pas encara fotut d'emplenar las qu'avèm? Me sembla a ieu que l'urgéncia es efectivament una sala de musculacion, mas tanben l'esclairatge. Se jogavam lo dissabte almens, d'espectators de Graulhet, de L'Isla, de Rabasrens, de La Vaur, de Sant Sulpici, de Montans, de Brens, de Britèsta viendrián véser jogar l'UAG. Mendre qu'ara pòdon pas venir per çò que l'UAG jòga en meteis temps que los clubs de las vilas que veni de nomenar. Metem l'esclairatge e emplenarem las tribunas!
Bon un còp de mai ai pas vist cap de Jucaire auèi. Vesi que totes demoratz dins la clandestinitat. Sabiái pas que los Juscabondas èra una confrairiá secreta. Me passegi totjorn amb mon drapèu roge e negre reconeissable amb la crotz occitana dins la partida roja del drapèu. Me podés pas mancar.
Dimenge que ven poirai pas venir as Aush. O regreti. Pr'aquò serai dins una quinzena a Bernat Lapòrta per recebre La Rochèla. Serà pas lo moment de cagar a las cauças. Doblidessem pas que per nos manténer nos cal encara ganhar quatre partidas. Siam pas sortits de l'albèrga.
Portatz-vos plan fantons e a lèu per d'aventuras nòvas amb l'UAG.
Jacadosament vòstra.
Sèrgi.