Braves Jucaires,
Qualques còps me demandi se juqui pas tròp! Aqueste matin en legiguent La Despacha, me semblèt legir qu'anavem aver dos Sudafricans de mau a l'UAG. Creseguèri que las lunetas se m'anavan tombar de sul nas. Se sabi encara comptar n'avèm ja tres de Sudafricans. Amb aquestes fariá cinc dins l'efectiu. Seguissi pas plan los afars, mas avèm tanben almens un Australian. Aquò fariá sièis de l'emisfèri Sud. E encara cresi saber que n'avèm qualques autres de las Islas del Pacific. Se contunham a n'aquel ritme caldrà arrestar amb l'occitan e passar a l'anglés.
Los quitis Galhard e Lucquiòt, se se vòlon far comprener a l'entrainament deuran passar a la parladura de delà la Mancha. Es plan luènh lo temps ont los entrainaments e las tresenas miègtemps se fasián en lenga nòstra...
Aquò rai! Cal pas èsser passadista. Ara sièm dins lo monde de la professionalisacion. Avèm volgut montar en ProD2, es pas lo moment d'o regretar, e ieu o regreti pas. Se los bailes de l'UAG son obligat d'anar far lor mercat en Africa del Sud, es plan que manca de monde per jogar. Agachatz tot aquel monde a l'infirmariá!
Me maini que totes los clubs prefessionals del Top 14 o de la ProD2 an totes un cinquantenat de contractes professionals. An totes un effectiu de 50 jogaires per far la sason. Nautres amb nòstres 33 contractes, èra prevesible qu'anavem pas acabar la sason.
Alavetz, fan plan de crompar dos jogaires de mai per far la sason. Ara que siem gaireben tirat d'afar, es pas lo moment de cagar dins la bòtas. Siem en ProD2 e, macarèl, i cal demorar. Se lo President a encara d'argent per crompar dos jogaires de mai, tan melhor!
Anem, a deman. Deman anam manjat de lion!
Dos Sudafricans de mai?
Dos Sudafricans de mai?
Lo rugbí es una fèsta. Es l'espòrt occitan per excelléncia.
