Putanièr! Ai pas escrich desempuèi lo 23 - 12 de l'an passat

[Sergi]

Putanièr de putanièr, a fòrça de manjar coma un tesson e de beure coma s'aviái la pepida, vos aviái doblidat, brave monde dels Jucabondas. Rendètz-vos compte que vos ai pas escrich desempuèi lo 23 de decembre de... l'an passat! Es tarribla aquela mentalitat. Tanlèu qu'avèm lo ventre plen, tanlèu que siam sadols, doblidam los amics. Veni de passar los quinze jorns pus marrits de l'annada. D'alhors es pas complicat pendent mai d'una setmana agèri l'impression de quitar pas la taula. Urosament encara que l'UAG fa ela tanben l'esfòrç de far una pausa entre Nadal e Cap de l'an. Se que non ont anirièm? O vos demandi... Imaginatz un pauc! Èsser obligat d'anar se fotre lo cuol sus un gradin de la tribuna de La Bòria alara que sièm encara sus la digestion. Me dirètz que cada dimenge es ben la meteissa causa. Que nani! Òm ensaja de manjar un pauc mens gràs e beure un pauc mens pesuc pendent l'annada. Mas es totjorn lo meteis afar: entre ensajar e capitar i a tan luènh qu'entre la linha dels 22 metres e la tèrra promesa.
Doncas mercés a l'UAG de nos aver pas mes al suplici entre Nadal e Cap de l'an. Mas soi a pensar que se l'estadi Bernat Lapòrta es tampat a n'aquel moment es pas un asard. Los bailes de l'UAG vòlon pas aver a amassar los cadavres de lors que mancarián pas de morir d'indigestion dins las tribunas. Mercés a n'eles per lor bontat e lo principi de precausion que meton en practica.
Bon, anèm, vau arrestar aquí los rasonaments. De fach, èra partit just per vos desirar en quatre mots una bona e urosa annada rugbistica e jucaira. Òc-ben en quatre mots...
Sèrgi.