L’UAG a begut un còp de tròp, visca l’UAGR !

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

L’UAG a begut un còp de tròp, visca l’UAGR !

Message non lu par Sergi »

Òc-ben l’UAG a talament begut d’aquestas passas que s’es negada. S’es negada jos un deute d’un milion ! Bon, anam pas un còp de mai destapar una botelha voida. Nos siem fach pro de mal atal. Lo fach es qu’ara la causa es oficiala : l’UAG es juridicament liquidada (liquidacion judiciara que dison). Adoncas a calgut tornar crear un club novèl a partir de res. Tot lo demai es estat balajat en una estona d’un còp d’estilòt. Atal n’es qu’aqueste club novèl s’apèla UAGR : Union Atletica Galhagòla Rugbí. Es normal d’aver ajustar en fin de sigle lo mot de « Rugbí » per çò qu’èra juridicament enebit de tornar partir amb lo meteis cigle. Mas i a quicòm que me tafura dins aquel afar : lo lògò ancian portava « UAG : 1901-2001 ». Qual sap se l’UAGR poirà, d’ara enlà, se glorificar d’èsser centenaria ? Qual se l’UAGR poirà se prevaler del palmarès de l’UAG ? Lo contrari seriá vertadièrament damatge per l’istòria dins la ciutat viticòla.
Fasiá un moment qu’èra pas vengut vos embèstiar amb mos rasonaments a quatre francs espanhòls. Vos daissavi jucar cadun del vòstre costat. Esperavi de ne saupre mai sus l’endevenir del club novèl e mai que mai lo nivèl d’evolucion per la sason que ven. Aquò tanben es ara decidit. Lo verdicte de la Federacion es tombat : serà la Federala 3. E encara ! Calquèt que Bernat Lapòrta intervengue per que nos retrobessem pas en serias ! Bon aquí una bona causa de facha que vertadièrament lo suspens deveniá intenible.
Ara una autra interrogacion... Se vos emmerdi amb mas questions avètz pas qu’a z’o me dire ! Vos sentissi l’uèlh banhat, lo niflador cramesit, la gauta flussa e la mina alassada per una debuta d’estiu ont fins ara es mai tombat d’aiga que de vin. Quitament a Galhac ! Alavetz, ma question : Qual sap se la salle de musculacion, que lo bastit n’es acabar al fons de l’estadi de La Bòria, serà acabada ? Finalament aprèp èsser estat lo club professional lo mens aplechat en 2006-2007, Galhac va devenir lo club amator de Federala 3 lo melhor aplechat del campionat. La ròda vira... enrè.
Tenètz-fièrs, flames jucaires. E que las bondas demòren imoissas ! Mancariá pas qu’aquò !
Lo rugbí es una fèsta. Es l'espòrt occitan per excelléncia.
Répondre