Santa Moneda preguètz per nautres !

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

Santa Moneda preguètz per nautres !

Message non lu par Sergi »

M’en dobtavi aièr quand vos escriguèri : Res es pas encara perdut de vèire Galhac-Graulhet en Pro D2 la sason que ven. Segon informacions publicas, la DNACG se torna acampar dimarç que ven per tornar examinar la question del manten de Galhac-Graulhet dins lo campionat de Pro D2. Aqueste còp siem plan obligats de dire « Galhac-Graulhet » per çò que justament le gendarma financièr de la Liga demanda ben -emai exigís- la fusion dels dos clubs e non pas mai l’union.
Aquela exigéncia a pas mina de rebutar ni a Galhac, nimai a Graulhet. Es un bon signe per l’avenidor. Es un bon signe per çò que, si que non, ont seriá passat l’esperit esportiu dins lo rugbí ? L’UAG ganhèt son manten sul tablèu de marca, deu poder contunhar a aqueste nivèl, emai amb un budgecte derisòri. Torni rebrembar a los qu’an la memòria corteta qu’aquesta sason Aush a subrevolar lo campionat amb lo budgecte lo pus bas de totes los engatjats.
Es vertat qu’ara los comptes dels clubs son en inflacion, son en pujada exponenciala. Es pas una rason per l’UAG de jogar pas lo jòc fins a la fin. Çò qu’es subretot pas normal es que la Liga la daisse pas jogar lo jòc fins a çò qu’esportivament tòrne, eventualament, davalar. Cal daissar a l’espòrt dire la lei de l’espòrt. Cal daissar los clubs, riques o paures, jogar la competicion. Es una question d’etica esportiva !
En esperant dimarç que ven, las calculetas van calfar del costat de Galhac e de Graulhet. Caldrà ven que los bailes del club novèl desvelan los noms dels dos esporsors exagonals que devon s’engatjar. Sens aqueles esporsors es probable que dorsièr siague pas acceptat.
Avèm pas acabat de nos resegar las sangs sus la ribas de Dadon e de Tarn. Remarcatz que quand n’aurem pas mai, de sang, nos podem transfusar a còp de pochetas de…Galhac.
Lo rugbí es una fèsta. Es l'espòrt occitan per excelléncia.
Répondre