Macanica de macanica, aviái perdut lo contacte !

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

Macanica de macanica, aviái perdut lo contacte !

Message non lu par Sergi »

L’autre jorn (sauriái pas vos precisar quora), èri sus un fodre a juscar siaudament una bonda, quand una fotralada d’enveja me pren de vos escalcir qualquas banalitats rugbisticas. Macarèl de macarèl ! Las lunetas me cugèran tombar del nas : la pòrta electronica èra barrada ! Coma o sabètz, i compreni pas res a n’aqueles afars de sitinets. Çò que sabi es que lo contacte èra copat. Sus aquela pòrta èra escrich quicòm coma : « Mon onestetat e mon imparcialitat son estadas mesa en causa, alavetz, tampi provisòriament lo forum ». Sabi pas plan çò que se passèt, mas supausa qu’aquò a degut èsser una consequéncia de la futura fusion. Sabètz d’aquela entenduda entre Galhac e Graulhet n’aurà fach fosforar mai d’un. Remarcatz que i a de que.
Ara per ara lo nom es pas encara trobat. Me soi pas asardat d’escriure als clubs per lor prepausar mon idèia. O ai pas fach per manca de temps, mas tanben per çò qu’ai pas res trapar d’original. Suggerissi, adoncas, siá « Entenduda Galhac-Graulhet », siá « Union Galhac-Graulhet ». Demòri dins la règa del cortet e de l’obligacion de servar los noms de las doas vilas. Nos cal imperativament defugir tot sigle. Cal que los noms de las vilas aparesque dins las resultas esportivas, lo diluns de matin. Se que nom lo club novèl, allòc d’aver doas anmas n’aurà pas cap. Un club qu’a per nom un sigle es un club fantauma, es un zonbin, un ectoplasme mediatic.
Aquò dich, soi plan content de vos tornar trapar. Ara, o vos disi coma o pensi : es pas la pena de jucar las bondas fins a las engolir per doblidar la fusion. Jucar per doblidar ?
Lo rugbí es una fèsta. Es l'espòrt occitan per excelléncia.
Répondre