Worthington manca bravament de vista.

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

Worthington manca bravament de vista.

Message non lu par Sergi »

Aqueste matin sul sitinet de l’UAG desfila en contunh una banda que repapia « Matematicament lo manten de l’equipa professionala es pas assegurat ». La colhonada ! Plan solide que « matematicament » lo manten es pas acquesís. Pas la pena d’èsser sortit de la Sorbona per saupre far lo calcul. E sabètz perdequé lo manten es pas assegurar al moment ont vos escalcici aquestas banalitats ? Per çò qu’aièr fasquèrem pas que resulta egala amb Colomièrs. E perqué fasquèrem pas que partida egala ? Perdequé perdèrem dos punts precioses al classament ?
Plan solide que i a mantunas rasons a n’aquesta funèsta resulta. Las vau pas espepisar totas que i seriem encara aquí deman matin. Me vau contentar de vos far remarcar que pecam fòrça dins la finicion.
Per ieu, se d’uèi « Matematicament lo manten de l’equipa professionala es pas assegurat », es, entre maitas rasons, en causa d’un detalh. Quant Worthington marquèt l’ensag de la partida, aviá mes dins lo vent totes los adversaris colomerins. Se trapèt sol en tèrra promesa, los blaus que lo perseguissián èran luènh darrèr. S’aviá agut un minimum de vista, allòc de se precipitar per aplatussar, auriá vist qu’aviá davant el una autorota que li permetiá d’anar siaudament pausar la bofiga entre los pals.
Comprenguèri còpsec que la transformacion seriá malaisida de passar alara qu’auriá pogut èsser una formalitat. Alavetz, m’entrediguèri : « Aqueles dos punts riscan de nos mancar sul planchòt a la fin de la partida ». Partit coma èra partit lo rescontre pensèri que riscavem de perdre la partida per un punt o dos. Agèri la presentida qu’aquel detalh anava nos costar car. Worthington a mancat sus aquel còp de vision del jòc. Me dirètz que la critica es aisida quand òm es plan sièt dins la travada de La Bòria e que n’es quicòm mai que d’anar marcar d’ensages en passant a travèrs un ridèu d’un quizenat de guses que vos esperan fèrme. D’accòrdi ! Mas lo contracte es aqueste : pagui la plaça per aver lo drech de criticar e Worthington es pagat per èsser encesat o criticat segon, lo trabalh fornit.
Ja l’equipa manca de nhac e de velentisa desempuèi la debuta de la sason. Se ara se met a mancar de vista, es solide que nos anam retrobar l’an que ven en « infèrn ». Tornarai pas un còp de mai sul desfachisme de l’Alan Galhard. Es aquel pessimisme, aquela victimisacion incompreënsibla de la part del baile de l’equipa que me còrferís lo mai. Amb un discors atal, es solide que dins qualquas setmanas nos anam retrobar sul sitinet de l’UAG amb una banda desfilanta que poriá portar : « Matematicament lo manten de l’equipa professionala en Pro D2 es impossible ».
Macarèl de macarèl es pas una sinecura que d’èsser suportaire de l’UAG !
Lo rugbí es una fèsta. Es l'espòrt occitan per excelléncia.
Répondre