Quinas emocions! Quinas emocions!!!

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

Quinas emocions! Quinas emocions!!!

Message non lu par Sergi »

E ben! Brave monde...
Veni d'atudar lo transistor subre loqual escotavi Sudràdio, mas vos pòdi dire que cal pas aver lo còr malaut. Pensatz, se jamai Kopensky (sabi se son nom s'ortografia atal) manca la seu transformacion aprèp la sirèna, perdem de 15 a 14 a Grenòble e se la capita ganham de 16 a 15. Dieu mercés per un còp avèm l'astre de ganhar. Macarèl de macarèl, bastava amb dimenge passat que perderèm d'un punt. Podèm pas tampauc perdre cada setmana d'un punt.
Òsca per nòstra equipa. Aquela victòria a l'exterior nos va far de ben pel manten. Finalament, s'ai bona memòriá, aprèp las de Bèglas e de Colomièrs, aquò nos fa la tresena victòria a l'exterior. Aquò pròba que nos demòra de sangueta a Galhac. Mas, ça que la, d'aprèp lo reportatge de Sudràdio, la partida a Grenòble es pas estada plan relusenta. Ja dimenge passat contra Tolon l'UAG auriá pogut ganhar gaireben "las mans dins la pòchas" s'èran estats mai valents. Atencion, atencion, Galhagòls, vos cal benlèu desrevelhar e vos aplicar tecnicament se volètz demorar en Pro D2. Vos cal subretot aber mai de nhac. Agachatz los de l'Esporiu Club Albigòl, çò que fa lor fòrça es lo moral. De mercés a lor valentisa, a lor volontat e a lor estrambòrd afrontan sens complèxe lors adversaris, quines que siaguen.
L'UAG es bona tecnicament. De mercés a nòstres entrainaires nòstra equipa es al nivèl del punt de vista de la mestresa tecnica. Ieu pensi que nos manca encara lo vam, la ràbia de ganhar.
Bon aqueste ser soi plen d'esper per la seguida. Podèm començar de betonar los palms per metre l'esclairatge de Bernat Lapòrta.
Òsca a l'UAG e a dimenge que ben a La bòria contra Lemòtges.
Lo rugbí es una fèsta. Es l'espòrt occitan per excelléncia.
Répondre