La desfacha contra Tolon es gaireben una catastròfa.

L'éndrets réservat per parlar patoès
Sergi
Poussin
Poussin
Messages : 52
Enregistré le : 15 oct. 2006, 09:06

La desfacha contra Tolon es gaireben una catastròfa.

Message non lu par Sergi »

Amics Jucabondas,
Vos sentissi pensamentoses e inquiets per l'avenidor e ne soi tan que vosautres. Aquela desfacha d'aièr contre Tolon s'es pas una catastròfa, pauc se'n manca. Aquò per mantunas rasons.
Primièrament es una partida qu'auriem pogut ganhar aisidament. Òc-ben, aisidament. Vist lo terren sanhós coma èra auriem pogut tirar la nòstra espitla del jòc. Amb las installacions qu'avèm, siem plan mai acostumat a mascanhar dins la fanga que nos pas riquissimes Toloneses. Aquel temps poirit de pluèja sens fin, èra de pan benesit per nautres. Dins una partida onte la tecnica èra pas de mesa, es pas que la volontat e lo nhac que podián menar a la victòra.
Alavetz, o cal plan dire, los uagistas mancavan tarriblament de vam aièr. N'èra una vertadièrament pietat. E quina lentor dins los gèstes tecniques! E aquel arrièr qu'òm diriá qu'espèra un òdre de mission en tres exemplars abans de tornar remandar la palma e desgatjar son camp. Aquesta incapacitat de desgatjar son camp d'aviada nos costèt fa pas gaire un contre dels adversaris e un ensag (me rebrembi pas contra cal èra). Aièr bis-repetità, se faguèt tornamai contrar. D'alhors se debana una partida sens que lo problèma se pause. Per çò que, se los Galhagòls son moligasses, los adversaris, eles, son plan mai aluserpits e galaupan coma d'esquiròls. Mentre que los uagistas semblan portar de cauçaduras a las sòlas de plomb, los adversaris quines que foguèron e que siaguen semblan caminar subre de ressorts. Sabi ben qu'avèm pas las installacions adeqüatas per s'entrainar correctament, pasmens aquò explica pas aquesta apatia que se vei cada dimange un pauc mai dins l'equipa nòstra.
I a tanben lo fach que las relanças a còp de pé a seguir son pas... seguits! Alavetz, comprega qual poirà, los rubiaires galhagòls son probablament los sols en Occitània a botar de còp de pé a seguir que finalament seguisson pas. Mas alara perdequé lançar de còps de pé? Per tornar sistematicament la bala a l'adversari? Òm z'o creiriá! Aquò dura desempuèi la debuta de la sason. Es pas lo primièr còp que lèvi la lèbra, emai contunharai tan que la situacion se va pas melhorar.
Aquela desfacha es gaireben una catastròfa per l'UAG per una seconda rason. La del classament. Se Colomièrs es ara quasi en perdicion amb 24 punts, emai per èsser nòuen siem pas qu'a quatre punt del Mont de Marsan qu'es antepenultièma (36 punts). Aquò vòl dire que i a pas que la paga d'una victòria entre lo nòuen e lo quatorsen. Per tot dire siem pas qu'a nòu punt de Lemòtges (siá un pauc mai que lo compte de doas victòrias), ara per ara l'autre relegable amb Colomièrs.
Siem pas sortits d'afar d'ont mai que nos cal encara jogar d'equipas coma Lion, Oyonnax e Bordèu.
Damatge, cent còps d'amatge. Un còp de mai avèm perdut l'escasença de nos metre qualques punts al caud en esperant la prima.
Tenètz-vos al canton e a lèu.
Lo rugbí es una fèsta. Es l'espòrt occitan per excelléncia.
Répondre